各位唔好掛住我, 近來都無心機打SPACE了, 希望去完台南之後有多D野同大家講啦...

         我終於掉晒D舊既鞋, 公司總共有2對舊既鞋, 一對著左唔夠一個星期就死左, 一對就前日濕左成對, 而家乾左就怪怪地, 好似想發毛咁, 唔掉都對唔住自己, 唉, 不過貓奴就變左無鞋著, 點解唔可以著波鞋呢, 反正都係SMART  CASUAL, 就不如CASUAL到底啦, 又要專登洗錢去買鞋, 真係當貓奴係呢度搵十萬九千七咩, 唉....

         琴日出左銅記買鞋, 行左幾度地方, 終於買左對灰色既鞋, 點知返到屋企八卦睇下個鞋底, 原來佢俾大左半個碼俾我, 當時我買既時侯, 個SALES佢叫我俾個鞋底佢睇, 睇下係咩野SIZE, 佢明明口講係6號, 點解又攞左對6號半俾我呢, 我試既時候又唔見有問題, 返到屋企先知道, 真係好慘呢, 而家都唔知攞唔攞返去換好, 我唔想攞來攞去呢, 不過如果我明天可以出去睇醫生, 我就攞去換啦, 費事用錢買左D唔啱用既野...

        次次都係亞姐放假, 果邊就同我講無酒店房, 次次都係咁, 係唔係蝦我先, 好啦, 到有房, 就講好多SHORT FORM來擾亂我, 係咁DBL, SGL, TWN, 咁DBL同SGL係一樣, 咁就統一D, 淨係講一個啦, 好亂, 成個朝早就咁無左, 為左D房, 我都做唔到其他野, 好唔開心, 好煩, 可唔可以唔用MSN溝通呢, 我一亂就咩都亂, 搞左好耐, 我先清晰番, 係我太蠢, 定係我悟性低呢...??

         黎緊既星期五就要去台灣了, 貓奴今次去既全都係農場, 真係怕會曬黑啦, 又怕有登革熱, 所以我已在公司買左蚊貼, 再買埋個台灣既插頭, 之後要再買D防曬就搞定, 呵呵, 而家煩緊, 帶唔帶埋狗哩熊出發好呢, 好想放佢係飛機既窗邊影張相, 一定會好上鏡既, 但係我又唔想俾其他人見到, 以為呢條友係傻既...點好呢??

         前幾日同柑柑影下相, 點知佢又週圍走, 都企唔定, 我又年紀大了, 都無咩力去追佢, 所以影出來既相有好多鬼影, 好有藝術FEEL, 呵呵, 都影得唔錯, 等我遲D去開攝影展先, 呵呵

         琴日食飯又討論週年晚會既事, 事關已經開左會, 一定要扮野, 我真係無晒辦法, 不過我既救星又出現了, 就係日本雯, 呵呵, 佢借多套日本衫俾我, 我最怕係套衫太靚, 我太肥襯唔起咋...呵呵, 不過真係好多謝雯雯幫我解決左呢個問題, 多謝你哦, 雯雯, 不過我唔係斷背既, 呵呵....

         琴晚放左工之後都有去同班美女同事食飯, 我地一行四人, 雖然唔齊人, 不過我地會再約另一次, 皆因來日方長吧, 琴日唔知點解, 成程都好靜既, 一有相機影下相, 大家就笑到仆晒X, 真係超好笑, 而主角緊係我地既仙女LING啦, 佢不停擺出誘人POST, 真係引死人呢, 呵呵, 唔講太多, 請大家睇相啦, 呵呵....

         今晚應該會同貓奴部門既美女們去食晚飯, 不過有可能唔成行呢, 因有位美女唔多舒服, 有位美女覺得自己今日面腫, 有位美女可能要陪老細食飯, 所以今日都唔係吉日, 我去唔去都無所謂哦, 反正來日方長, 不過可能係自己近來咩都提唔起勁, 俾人覺得我係好兇狠, 邊個唔去死邊個, 我都無咁想過既, 我覺得最緊要大家開心, 唔一定出街先開心, 有時一齊出去食LUNCH, 行去搵野食既時候, 有人同我吹下水, 已係超級開心, 所以呢, 如果今日去唔成, 我地都可以另擇吉日, 而且收到個好消息係, 在外求學既美寶回流了, 所以可以約個吉日叫埋佢出來聚, 多人D, 仲好玩D添...呵呵

         所以希望各位體諒貓奴, 貓奴係咩都放係個面上面, 自己又鐘意鑽牛角尖, 諗緊D公司以外既野, 可能會想到好灰, 唔多有心情, 受過貓奴面色既朋友, 真係對唔住, 呵呵, 我會去食藥同搽D面"蒙"膏, 務求時刻都笑面迎人...嘔~~~

         今年既週年聯歡晚會, 要扮野, 好唔開心, 明明係正經既飯局, 點解要扮野, 好唔開心唔開心唔開心, 又要煩著咩野衫, 搞咁多叉野, 又唔會俾任何津貼你, 要你貼錢, 都幾賤格, 我唔想扮, 我唔扮, 你耐我咩何, 但我又唔想因為呢d小事而家人插......點好??唔開心......

         話說我琴日要鼠去睇醫生, 咁一出去, 就賴野, 一出去就見到老板在等電梯, 死晒, 好在佢無問我去邊o者, 因好明顯果時唔係食飯時間, 而我又"咩"住手袋, 成個look都係好可疑既, 好在佢咩都無問...不過我係小薯仔, 可能佢都唔記得我係咩部門既, 好彩, 之後呢, 就係一個惡夢既開始...

        去到銅鑼灣, 上到診所, 原來有楊醫生同梁醫生, d姑娘以為我約左梁醫生, 查實我係想睇楊醫生, 上到去知道佢搞錯左, 唯有先落街行下, 等到夠鐘就再上去睇醫生囉, 唉, 好黑, 落到街, 熱到爆燈, 差D熱死左係銅鑼灣, 順利地睇完醫生就返屋企, 係屋企門口發現我係無帶鎖匙, 原來個天係唔會放過我既, 貓奴打俾家姐, 佢又唔聽電話, 原來佢放假, 跟住媽媽又開緊工, 聽唔到電話, 求救無門, 走左落街問開鎖會點開, 佢話要爆開把鎖, 我就快爆炸就真, 咁我知媽媽一定在公司, 就又再遊車河去銅鑼灣搵佢攞鎖匙, 返到屋企已一百個巴仙係成身臭晒, 激死, 不過, 有門口入已十分興奮...

         返到屋企睇下電視, 又成頭汗, 因貓奴廳係無冷氣既, 反正都臭, 我要臭到底先沖涼, 呵呵, 整下狗哩熊, 食埋飯就忍唔住死左去沖, 仲勁過燒完野食, 真係好臭, 返來換左套衫都臭埋, 我真係唔鐘意夏天, 好熱, 又好快臭晒個身, 好唔舒服, 加上我又超黑仔, 令我更加辛苦, 我真係想自己變得好運D呢....

        今日請左半日假, 走去睇下醫生, 入左來做, 真係週身病痛囉, 以前一年都唔睇一次醫生, 而家就密密咁睇, 去完台灣仲好似衰左添, 唉, 月尾又再去, 所以今日去睇下醫生解決佢, 呵呵, 不過呢, 我以為醫生佢下午都開工, 點知醫生佢收一點, 死啦, 我請下半奏假架麻, 咁我唯有靜靜地再早少少走, 我都唔想架, 如果唔係醫生佢玩野, 我都唔會做d咁既事既, 希望我今次無事啦, 上次睇完呢個醫生就入左醫院3日, 上次仲要又係呢段時間, 我記得係媽媽節果日出院的....希望今次唔駛啦, 希望食藥就ok, 求神保佑我.....

         我既錄影機終於復活了, 好開心, 貓奴果日聽各友好既說話, 去睇下佢係唔係甩左線, 雖然睇左佢係無甩到既, 不過呢, 唔知點解, 近來佢錄野又有番聲, 好在我無抬去整咋, 有時人做野慢D都係唔錯既, 好開心, 前日倒帶時發覺, 點解套劇會有聲既, 原來佢已靜靜地好番, 真係開心死, 貓奴家姐覺得佢係鐘意俾人摸PAT PAT既, 所以佢俾我摸完就自己好返, 真係好開心, 唔駛成日都睇字幕, 雖然貓奴睇明X台節目都一定要睇字幕, 不過有D背景音樂係唔同好多既.....

 

         近來開始熱啦, 真係熱死貓奴, 琴日起左身之後去左洗衫, 洗就無咩野, 一晾就想死, 晾完衫都成頭汗, 成身臭晒, 跟住就再執屋, 星期日好充實, 最慘係瞓瞓下既時候, 媽媽打來話果間買料整狗哩熊既鋪頭係休息, 晴天霹靂, 貓奴又無得整熊仔了, 星期六果日放左工, 已好勁地由金鐘行在去中環既石板街睇下有無得買料, 點知佢地連棉花都無, 貓奴家姐仲點我去, 點知, 就係又係成身汗之麻..

        不過我真係幾鐘意中環, 石板街都幾多野行, 如果可以搬去果頭住都唔錯呢, 又近返工, 行都行到返去公司, 都唔錯, 而且又多鬼仔, 真係好好好唔錯呢, 呵呵, 而且果邊有檔好好食既芝麻糊, 之前返學, 上TOUR GUIDE堂既時候, 同學仔帶我地去食既, 不過而家你叫我行去果度, 我都唔係幾認得路, 果檔野係兩個老人家開既, 好似全部都係人手做既糊, 真係唔錯架, 又平, 如果大家行開都可以一試, 有一包包賣, 俾你返屋企慢慢食既, 想烏髮人士更加要試下啦.......

       P.S. 添仔, 我都想做到咁大, 但係呢, 我做一隻都差唔多成個星期, 如果要做到上市, 唔知要做斷幾多對貓奴手先可以呢, 呵呵, 如果上左市, 一定搵你做GM啦, 呵呵....

         琴日放假, 同左亞媽去行街街, 真係好開心, 因為好耐都未同過老媽子行街了, 我地先去時代, 再去利舞台, 之後去SUPER SANDWICH度HIGH TEA, 呵呵, 再殺去女人街買料整熊仔, 再再殺去宜家家私行下, 我見到D食飯枱真係唔錯, 都係500蚊鬆D, 不過張櫈就貴了, 都要成300蚊, 唉, 不過幾靚都好, 間屋咁梅, 買咩野靚家私都無用啦, 呵呵

        琴日再開工, 同狗哩熊再駁過, 今次大檸樂, 發覺係唔夠棉花, 我就係因為咁而被迫停工, 唉, 真係好慘呢, 呵呵, 我本來琴日買料既時候會買埋棉花, 點知老媽子話屋企仲有, 唔好買住, 而返到去, 佢既仲有, 只係夠塞個頭, 仲要係塞唔漲, OH, SHIT, 但係我今日真係唔想去銅鑼灣, 唯有靜間行去中環石板街, 睇下人地收晒工未啦, 所以我今日一定要準時走, YEAH.......

       P.S.我盆盆栽生長得唔錯, 不過好似有生野既情況出現, 真係有D擔心, 我唔想掉左佢哦.....

         出團前買左本整公仔既書, 係整我最鐘意既狗哩熊, 呵呵, 好開心, 雖然係80幾蚊, 不過呢, 都值得既, 因我估, 出團都應該搵到D, 咁就預先買左D野獎勵自己先, 呵呵, 前日影左D紙樣, 琴晚就開工, 不過真係幾難整, 事關我買既布既色都深左一個TONE, 所以就決定整隻大D既, 一次過用晒D唔啱色既布, 一係就唔整, 要整就整最大隻既, 呵呵

          不過整親D咁3D既公仔都好叉辛苦, 因好易就整到走晒樣, 我琴日整左都一大部份, 不過呢, 個鼻係好叉難整, 白色果塊鼻既布, 好似都唔夠大, 點縫都縫唔埋, 縫埋左, 又好似有D怪, 都唔似本書咁靚仔, 而家貓奴好失望, 有D唔想再整, 但又唔想半途而廢, 隻熊仔都有生命, 而家唔整埋D手手腳腳, 佢咁就成世, 又係幾慘既, 唉, 好煩哦, 不過反正聽日都放假, 同老媽子飲完茶之後再返去同狗哩熊駁命.....(貓奴家姐話隻熊個身好似人地載手機既袋, 見附圖)

         P.S. 小青, 我都好想同你地去街街, 不過呢, 文文佢未恢復元氣, 小LING又多工作做, 小PINK又多節目, 不過我都會盡下力去約齊佢地, 希望我地快D開團啦, 呵呵

         琴日好叉大雨, 仲行晒雷, 家姐話小虎好驚, 叫我抱佢入房同佢瞓, 因為虎虎未入我梁家門既時候, 佢係俾人淩"肉"過, 我又未有時間同佢洗白白, 所以一直都只係放佢係廳, 日日同我一齊睇電視, 因我要我既床係無菌空間, 所以一直都無帶佢入房, 不過見佢之前咁乖俾我著襪仔, 咁我就帶佢入房啦, 佢仲好待遇過柑柑, 柑柑佢一入房, 就會俾我地趕佢出去, 因佢實在太唔自愛啦, 成日都污污糟糟.....

        點知瞓到半路, 我發左個大惡夢, 好邪, 睇下電話, 只有3:45分, 都唔知係唔係小虎既磁場令到我發惡夢, 我轉個身就見到佢個死樣, 即刻將佢個頭向床尾, 搵佢個PAT"得"住自己先, 跟住先瞓到覺咋, 可能虎虎對眼會發出不良既磁場...........嗚....(鬼叫)......

         放左幾日假, 除左倒垃圾, 我都無乜出過家門, 呵呵, 本來呢, 我會有個約會既, 不過呢, 可能係貓奴太黑人憎了, 所以人地都唔預我, 嗚...電話都無個, 我又唔想打去問, 好似求人地叫埋我去, 所以由佢啦, 我都預左啦, 放假前幾日已收到風, 應該去唔成, 真係好失落, 連小PINK叫我去BBQ, 我都無心機去, 連覆佢都唔記得左, 日日係屋企坐, 天光坐到天黑, 嗚.....好落幕........

         跟住我好無聊, 迫虎虎著住我係台灣買既襪仔影相, 我家姐話聽到虎虎既喊聲, 有咩可能丫, 我D襪仔咁靚, 不過真係好抵, NT$100有6對, NT$200有成13對, 不過我只買左6對, 因我果日唔夠台幣, 呵呵呵