琴日買左某品牌既潔白牙貼, 好新奇囉, 不過好似有D"拿", 唔知係唔係正常既, 咁呢, 原來果半個鐘係好難捱既, 因為呢, 人緊有口水既, 我又唔知吞唔吞好, 因果D口水好似有果D潔白牙貼既野, 如果吞左, 會唔會潔白埋我個人呢, 由內白到外, 由內靚到外, 可能係由內嘔到外, 我不停地含住, 有大量既口水, 講到呢到, 可能大家都想嘔~~, 跟住我頂唔住, 因佢已超越左我既容量, 我就走左入去廁所放水, 咁先頂到半個鐘, 如果一日要用兩次, 都幾煩, 好難頂, 不過買左又無理由唔用丫, 仲要我係買左10日裝既, 真係自己搵自己老襯呢, 好蠢....

         琴日同左小PINK同佢HONDY士丹尼先生去左食越南野, (小PINK我爭你一餐飯錢, 一餐晚餐OR兩餐LUNCH), 跟住就去左CB, 先去地帶放左D蛋先, 我真係覺得自己為左地球出左好大力, 又用環保紙啦, 又放蛋啦, 又唔用氣壓式既用品啦, 又唔用殺蟲水啦, 我係環保戰士, 呵呵, YEAH, 跟住就買左對新鞋, $80蚊, 好抵呢, 跟住呢, 仲買多左對貓貓既拖鞋, 好鬼Q架, 不過要訂先至有, 我隻腳太大了, 大腳九(比大腳八仲要大)....呵呵

         跟住SHOPPING完就去左報GYM, 好開心, 報左26個月, 平均要$192一個月, 都唔錯啦, 係長期抗戰, 我要加油哦, 地獄式去減唔啱我既, 做GYM呢種天堂式就唔錯, 呵呵, 跟住就去左日本文佢極力推介既心心度買野, 呵呵, 不過我怕自己買左唔會穿呢, 因為貓奴我鐘意自然美, YEAH.........

         陣間貓奴會出去機場, 呵呵, 我仲帶左相機添, 不過呢, 琴日亞姐話, 如果係早結束的話, 要返來公司, OH, SHIT, 我真係唔想返來哦, 如果返來, 即係要做野, 即係要OT既機會又大左, 妖, 放左工又會同小PINK去放蛋, 真係好開心, 原無意外, 我應該會今日去報做GYM, 要瘦身成功哦, 呵呵

        琴日呢, 亞姐俾左盒野我, 我估係飛機, 但估唔到係咁正既, 係一架細細既飛機, 好正, 不過呢, 雖然佢可以俾我放係電視機頂, 但係怕佢太重跌落黎時重傷, 所以貓奴打算擺佢係房, 日本文話隻野都應該要90蚊, 我仲以為要百幾蚊呢, 成日都以為越細會越貴呢, 呵呵....

         家姐買左套<<我係金三珣>>既DVD返來, 係咁煲, 真係好好睇呢, 可能係睇得太多了, 我前晚發夢, 夢見超靚仔既男主腳, 亞真憲哥, 呵呵, 真係開心死貓奴哦, 不過而家亞視都播到去尾聲了, 應該做埋今個星期就會大結局了, 到時電視機又會變得無野睇了, 嗚....

         我已決定左出團, 應該會14號去台灣, 好緊張, 明天會去機場, 可以先睇下環境, 不過機場之前已去過一次了, 今次係我第二次去既, 希望出團會平平安安, 而家想緊, 買唔買個喼好呢, 因如果出完呢團唔想再帶團, 5-6月應該有機會去長榮既FAM TOUR, 咁係唔係有個喼會好D呢, 問人地借又好似會麻煩到人地, 如果大家知邊個牌子既喼好用既, 就介紹下俾貓奴丫..

        今日個MSN死死下, 我而家先入到來, 又要收工了, 唯有明天再寫了, 走先, BYE各位..

         究竟我出唔出團好呢, 因我已有左個牌, 係唔係應該踩落去睇下呢, 又可以搵D錢去買PSP, 但係真係好怕會出事呢, 我又無膽, 下下都係有頭威, 無尾陣, 得個吹字, 好多友好同事都叫我出台灣, 小青佢又去, 可能會撞到都唔頂, 好似唔錯, 而家心郁郁, 琴日霞姐先話我, 話我得個講字, 成日都唔肯行出第一步, 家姐就話, 如果我係做唔長既, 如果今次唔出團, 就會無機會出團, 唉..真係好心煩, 不過我都要今日次內同亞姐再講, 如果我真係要出團的話...

         聽日放假了, 好開心, 好耐都未攞過假了, 雖然都只係半日, 但有得瞓晏D, 就已好滿足囉, 呵呵...而且聽日會去剪髮, 希望唔會剪個"七"頭啦...

        當你如果去緊痾鎖鏈既時候, 發現原來個廁所無廁紙, 你會點做呢, 琴日睇左金三珣, 三珣話, 面對呢D情況, 會按大家既血型而有唔同既應變方法...

        A型:係忍耐型, 會等洗廁所亞嬸返轉頭俾廁紙你

        B型:係性急D既, 會用手指解決

        AB型:會執D用過既廁紙來用

        O型:係好有個性既, 會唔抹, 就咁走出廁所

       另外呢, 三珣仲提供左一個方法, 就係用襪來抹...(如果你有著襪的話)

       呵呵, 真係好好笑, 我都係大約記得係咁啦, 希望無記錯, 不過呢, 我係唔會話俾你地知, 我係咩血型既, 費事你地攞晒廁所D廁紙來整古我, 哼哼

       P.S. 小K, 我出機場係有間AIRLINES要我地去學劃位, 以後可能唔止入名, 仲要幫D團友劃埋位, 真係做死人了....PINKY, 我估你係織冷衫, 因你好似要趕係5月士丹尼生日時送俾佢, 我有無估錯呢???

          今日小青佢帶左佢部新既PSP回來, 好好玩, 佢有個碌波既GAME, 真係好好玩, 搞到我都想置番部囉, 不過都要千幾蚊呢, 呵呵, 點都平過買部電腦, 可以考慮下, 而且D畫面係好靚架, 之前成日都覺得, PSP果D GAME會好悶既, 不過我諗我要改觀了, 不過小青話NDS仲好玩, 但係我又覺得呢, 好似PSP個款型仔D呢, 如果返工放工都可以有機打都唔錯呢...

          近來真係好累, 改過晒D台灣行程之後, 真係一身都鬆晒, 真係想星期六放半日假, 但又睇到有好多團要FINAL, 唔知亞姐會唔會唔俾我放假呢, 就算我FINAL晒, 都要對飛啦, 如果我放假, 唔知佢會唔會面黑呢, 唉也, 真係好煩, 下星期三我地要出機場, 好開心, 呢次係我第二次出機場, 初頭亞姐同我講, 我可能下星期三要出去, 仲以為有FAM TOUR, 不過都好啦, 唔駛做, 可以出去行下, 好開心, 我仲想帶埋相機去呢, 不過小青就唔多想去, 因怕去完仲要返來公司, 咁又係既, 如果佢好早就完, 咁就大檸樂啦, 搭車錢都蝕埋啦, 不過我依然係好興奮既, 呵呵...

         P.S. 亞婷, 我唔係專登去種黃牙白既, 係咁啱大家緣份到, 佢又開左花, 我就順住個勢俾D仙水佢, 佢就快高長大囉, 我想再種黃牙白, 係因為想延續佢既生命囉, 呵呵

         大檸樂, 琴日想起我既黃牙白, 咁我就去探下佢啦, 點知, 佢真係乾得好緊要, 比之前仲要乾, 連媽媽都話要掉左佢, 因黃牙白而家佢變到個樣有D恐怖, 我叫媽媽幫我揸住影張相, 佢都好大聲問我點解要佢揸, 嗚..可想而知, 亞白哥仔他乾得幾恐怖呢, 我今次幫佢影左幾張遺照, 我都唔知幾時再可以撞到一棵咁有個性既黃牙白了, 唔通要等下年新年再買再養嗎, 呵呵, 我想俾D花肥佢, 睇下佢會唔會有番晒水, OR幫佢敷D WATER SLEEPING PACK, 可能就可以PUM PUM, 充滿水份, 好, 今晚就試下先...

         我都講左轉工有一段日子, 次次都係得個講字, 真係覺得自己好無用, 我知明白既, 泡菜講既野都有道理既, 但係有人又覺得我仲後生(未換智能身份証架), 應該出去"廠"下既, 而且呢度做野亦唔見得係好有趣, 反而做每件事一步一驚心, 又做得唔係咁開心, 係, 真係做熟左, 但係, 我真係無心再學呢度D野, 而且我亞姐佢都無心去教啦, 唉...

          好, 為左証明我真係合格左, 我影左個黑加白俾大家睇, 呵呵, 分享下我既喜悅, YEAH, 仲有D牙白仔既相, 佢仲未掉架, 如果有人有辦法救生佢, 我就拱手相讓, 絕不後悔, 呵呵

         今朝HR既同事打俾我, 話我知我既領隊牌RESULT返左了, 我就即刻衝入去攞啦, 好開心, 雖然估到多數都合格, 但係未收到信, 個感覺都唔CFM既, 一開信, 就好好好開心, 不過呢, 俾塔塔牌話我一出國就爆鑊, 搞到我都唔夠膽出團, 唉....不過呢, 我未搭過飛機, 所以先令我卻步, 點知自己會唔會畏高, 點知自己會唔會暈機浪, 咩都唔知, 點帶人地過關呢, 我真係咩都唔知, 總之呢, 有牌都無得出團, 我太無自信了, 就算唔係塔塔牌, 可能自己都無膽去帶團...唉...咁為左咩而考呢個牌呢??

          有位舊同事話, 佢既新公司請人打單張, 我都心郁郁, 因呢度真係麻麻地, 轉下環境都唔錯, 聽講, 呢位同事既新工果邊, 好多都係我地既舊同事, 而且工作量一定比而家少, 老板又係鬼佬, 福利都會好好多, 不過呢, 而家呢份工都有野好既, 先講返工地點, 金鐘, 話晒都係高檔商業區, 人都HIGH D啦, 工作環境都OK, 又唔駛對客, 做後勤幾唔錯, 另外呢, 同事, 工作伙伴都唔錯, 所有我留都有原因, 而家只係睇下係留既心>走既心, 定係走既心>留既心...今朝又俾B大人捉左入去照下肺, 詢問我自己對亞姐既態度如何, 又問亞姐對我如何, 無疑係好左D, 但係你估可以好幾耐呢, 伴君如伴虎, 心亂如麻...

         今日好緊張, 因為亞姐佢放假, 佢交低左, 叫我出左個價目表, 真係好叉驚, 好怕出錯呢, 用word去砌呢d野, 真係好有難度, 你一郁, d野就好易走晒位, 可能我用word既功力仲未到家啦, 我電腦又唔係叻, 唉, 真係好想再去讀書, 再學多幾技旁身, 周身刀, 張張利, 就唔怕搵唔到工啦, 不過呢, 資金係一大問題, 如果有人資助下就好了, 日本文想去學日文, 佢有honey資助, 貓奴要靠自己, 好慘, 要計下有無咁多先得, 而且我想學做個記者多d, 因為果個係我既夢想丫麻, 而hku space又有相關既course, 我都係要睇下我個豬仔錢箱有幾多錢先, 先至作決定, 文文, 你要等我.......

         不過今日都ok開心, 因我終於見到太陽了, 不過呢, 即係表示就快就會熱了, 我個人比較鐘意冬天多d, 因可以著好多衫, 又可以帶頸巾, 呵呵, 今日放左工打算返去執屋啦, 洗衫啦, 講起洗衫, 貓奴既家姐真係好懶, 衫都唔洗, 我幫佢洗左兩大機衫先洗晒d污糟衫, 如果佢一個人住, 佢屋企一定會變左露宿者天堂, 呵呵

         p.s. 小pink, 如果你想種黃牙白, 記住要掛起佢, 唔好一開始就放佢落泥, 不過呢, 天氣開始熱了, 小心養出虫來......嗚...(虫叫)

         琴日媽媽佢向我report, 棵黃牙白個下身(唔好諗邪野)好似就快死, 但係亞黃生佢係靠個下身來提供養份既, 如果下身死左, 就連d花都會死, 我即刻盆亞媽, 問佢係唔係無灑水, 搞到佢乾晒塘, 媽媽佢話有, 不過呢, 都係好乾, 媽媽想緊, 睇下可唔可以種落泥度, 再種大d, 但係我發現左一個問題, 佢都無根, 究竟係種唔種得生既呢?? 家姐就好大反應, 話呢棵黃牙白有毒先至會生花, 我同亞媽就一齊罵佢, 只有薯仔有毒先生芽之麻, 菜心都生花啦, 唔通你又唔食咩, 正傻仔!!咁最後呢, 我同媽媽都係決定左繼續去養大佢, 唔理任何人既反對, yeah...

         我幫黃牙白影左d相, 但係媽媽隻手好q震, 影到有d鬼影, 再加埋我既超高技術攝影效果, 真係影出來好有王家衛feel, 呵呵, 仲有影左d手信既相, 真係好多謝大家, 去到邊都有想起我, 不過, 我係唔玩斷背山既, 呵呵...

         今日呢, 又有手信收到, 係一個屋仔型既擺設, 好靚架, 有兩層高, 如果可以住人入去就好了, 呵呵, 我不嬲係屋企都無咩地位囉, 好多野都唔知放係邊, 如果自己一個人住就好了, 另外, 日本文佢放左假, 都有買左個公仔俾我, 我打算介紹佢俾虎虎識, 等虎虎佢多個FD, 唔駛成日都俾柑少蝦佢....

         琴日放左工之後, 同事小pink佢捉左我去做fans, 佢去左打壁球, 同佢honey一齊打, 我要去做佢地fans旁觀, 因我好怕果個波, 好怕佢彈返轉頭, 所以我就坐出場外等佢地, 小pink既honey士丹尼都幾好人, 唔似我d fd既honey, 希望有機會再做佢地fans啦, 呵呵

        跟住上左小pink佢屋企, 佢屋企真係唔錯, 有無敵大海景, 咁啱我見到佢有個電子磅係度, 我襯佢洗白白時無人就踩左上去, 貓奴好後悔哦, 因貓奴真係好肥, 又唔肯接受現實, 一踩上去, 就咩現實都出晒來了, 好唔開心, 真係好肥, 而家係貓奴呢世人最肥既時刻, 真係無得救囉, 我都好想瘦, 我又唔係食得特別多, 又唔食宵夜既, 點解真係肥得咁快呢, 見到仙女ling佢瘦左咁多, 都想學佢, 又見到個個友好同事都瘦, 我都想瘦哦, 呵呵, 小青, 你快d決定去唔去做gym啦, 你仲唔決定, 我就先行一步了, 因我d脂肪等唔到你哦, 呵呵...

       p.s. 小k,我個牌都唔知得唔得架, 係QA部既D先生話我PASS左, 因佢係果度D人, 佢有辦法知既, 不過唔知可唔可信呢, 呵呵, 都係等月尾有RESULT先知係唔係堅既... 

         今朝換左對新鞋, 嘩, 夾到丫, 真係夾到對腳都紅Q晒, 又痛, 痛到入心囉, 我忍, 打算撐大佢, 不過, 我最後都頂唔順, 都係換番對舊既, 好在, 我醒目女, 無掉到舊果對, 我真係覺得自己醒到爆哦, 呵呵, 不過呢, 買左又唔著, 真係好浪費, 而家都唔知點算好, 小青話搵野塞大佢, 我就用左對腳去塞啦, 真係塞到X晒街, 嗚.....

        今日有收到好多手信, 有位同事及霞姐去完玩, 一個去泰國, 一個去上海, 有食得, 有唔食得既, 貓奴既人緣都唔錯, 大家去要異地都記得貓奴, 呵呵, 貓奴既領隊牌好似已經PASS左了, 不過貓奴之前玩塔塔牌話, 如果出國, 會有好大個鑊爆出來, 所以寧可信其有, 不可信其無, 所以, 如果真係PASS左, 我都唔會出團了, 等我去過台灣先出啦, 我呢D, 有錢都唔搵, 真係犯賤, 呵呵, 所以小名叫賤賤, 勁....

         近來愛上左一套劇, 就係果套亞視既韓片, 我係金三珣, 真係超好睇, 又有笑, 又有靚仔睇, 而且呢劇情都幾新丫, 之前都未睇過, 肥妹仔拍靚仔, 真係好好笑, 估唔到韓片除左令人喊之外, 都可以令你笑到仆地, 呵呵, 真係好推介大家去睇呢套劇, 不過而家先去睇, 有可能唔明佢講咩, 有咩唔明都可以問我, 不過貓奴呢, 第一集無睇呢, 我知有呢套劇都係因為果日同亞bear入完迪迪尼玩既時侯佢講我知既, 估唔到佢都無介紹錯, 真係好睇, 淨係睇個靚仔都補番晒啦, 正, 勁正, yeah...

 

女主角金萱兒自2001年起便一直以電影為主，五年之後再次接拍電視劇，為了扮演肥胖的金三珣，特別於兩個月內增肥十五磅。金萱兒的演出獲得女性觀眾壓倒性的支持，令到她的人氣隨著劇情推進而火速上升，甚至連劇集完成後的減肥問題，也成為觀眾的討論焦點。

男主角玄彬之前所接拍的韓劇並沒有引起多大反響，但卻因此劇紅爆韓國，成為新生代偶像。劇中飾演一名受過打擊而深深自責的27歲大男孩，表演扎實，從"超級幼稚王"到敢於表達自己感情、敢於為心愛的人付出的進化過程，演繹得絲絲入扣。

         近來小柑好似又肥左少少, 而且呢, 我地發覺柑柑佢好似仲未認得自己個名咁, 叫親佢都無咩反應, 媽媽見佢好似肥到隻豬咁, 就改左個名叫"柑豬豬", 真係十分Q, 而且柑柑對呢個名有D反應, 唔知係佢唔鐘意呢個名丫, 定係好冧呢個名, 總之係有D反應, 以前小白, 你一叫"小白", 佢條尾就狂發, 有時會拍落地下啪啪聲, 就係柑豬豬咁蠢, 到而家都未認到自己個名, 都一歲幾啦, 佢個名發音又唔係怪, 唔知點解佢少少反應都無, 有時叫佢"白痴仔", "仆街仔", 佢都會喵兩聲, 係叫柑柑佢就無反應, 好Q奇怪囉, 呵呵...

        P.S. 小青, 下次我地開團時, 就去呢間泰簡單度食丫, D野食真係幾得架, 一個月一次聚會丫麻, 等大家一得閒, 就可以出發架啦, 呵呵....

        貓奴就快諗到頭都爆, 究竟邊個係黃牙白, 快D速速現身, 快D, 快D,

         琴日放左工之後, 同吳同事一齊去銅鑼灣, 因貓奴想去做GYM, 咁佢就陪貓奴去格下價, 而家睇左舒X堡格價, $184 X 26個月/ $239 X 12個月/ $299 X 6個月, 貓奴覺得瘦身係長期抗戰, 應該要選一個26個月既, 兩年多, 都唔係好長, 不過係怕自己唔夠恆心, 不過都係4千多, 都OK既, 都唔係好貴, 不過都要睇下小青同事決定如何啦, 呵呵, 希望可以快D做運動快D瘦囉, 加油, YEAH...

         跟住格完價之後, 吳導遊帶我去食泰國野, 果間野係總統附近, 叫泰簡單, D野食真係唔錯, 以前都無真正地食過泰國菜, 原來泰仔野都唔錯既, 次次同D朋友仔出街都係食日本野, 都食到咀都甩埋, 而家試呢D新野都唔錯, 不過原來都幾辣架, 希望唔好爆瘡啦, 呢間野D格局係好唔錯既, 又好坐, 而且仲有露天位, 到九點多又有LIVE BAND, 不過吳導遊話佢地係可以點歌既, 中文歌都OK, 不過我比較想聽泰文歌, 因貓奴覺得泰文真係好好笑, 聽唔明都覺得好好笑, 呵呵...所以我地東南亞同事下次開團, 都可以去呢間泰簡單度食野, 呵呵..(重點:琴日又去左扭蛋, YEAH)

          P.S. TO:黃牙白, 你究竟係邊位, 我真係估唔到邊位人兄咁叉得閒去扮演一棵黃牙白, 而貓奴為左配合黃牙白先生/小姐, 仲寫左一封信俾你, 所以希望你現真身出來, 俾貓奴開開眼界...

         黃牙白先生/小姐,

         你好, 我地已相識左有個多月了, 希望你喺我屋企生活得開心啦, 其實都幾好食好住, 你又俾我地掛高左你, 免除了被柑少既襲擊, 每日又供給新鮮既泉水俾你, 好食好住, 應該無理由唔開心丫, 琴日老媽子將你"的"俾我睇, 你都幾快高長大, 又開左好多花, 希望你能夠開枝散葉啦, 生多幾棵黃牙白, 咁老媽子又可以打多d"釜頭", 又可以有多d私己錢, 到貓奴生日時又可以"作"佢一筆, yeah, 所以, 你要努力地生存下去, 為左我既將來而努力哦, 加油...

          from貓奴(小名賤賤)

         而家個心仲係留左係迪迪尼, 有同事話唔鐘意迪迪尼, 因為佢地係奸商, 不過呢, 入到去玩真係好開心, 理得佢係唔係奸商丫, 人地奸得咁出位, 都有咁多"粉絲", 你真係吹佢咩, 都係為左入去開心下O者, 我就有D想入左去唔返出來囉, 呵呵, 不過呢, 我又唔捨得現實世界既你們, 所以貓奴我都係返左來出來現實既世界, 而且我果張係一日TKT, 唔出來都唔得, 呵呵...

         今明兩天, 我亞姐都放假, 佢又係入去迪迪尼玩, 我同長榮既美女都係同一反應, 我入完去迪迪尼, 亞姐又跟住入去, 大家同時間爆左一句:"正一跟尾狗", 呵呵, 開心死我, 不過可能亞姐係入去玩既關係, 心情特別靚, 我就忙到仆街囉, 佢一唔係度, 就好多特別既事發生, 真係唔俾我過一日好日子, 唉...大家都係入去迪迪尼玩, 點解佢可以放兩日假, 而我只可以放一日假丫, 如果今個月尾真係可以去多一次, 我一定要放兩日假, 呵呵, 入去玩餐飽既, YEAH

          貓奴既母親大人新年既時候買左棵黃牙白, 到而家仲係度, 呵呵, 仲要種出個未來, 呵呵, 有種到花, 貓奴同媽見D花都幾靚, 就唔掉, 繼續種落去, 而家媽媽就間唔時酒D水, 希望可以種瓜得瓜, 種多幾棵黃牙白出來啦, 勁~~~

         琴日殺左入迪迪尼, 好開心, 真係好好玩, 唔明點解咁多人都覺得迪迪尼唔好玩, 入到去, 任何人都好似變返做細路, 當然包括貓奴啦, 呵呵, 連埋入場卷, 貓奴用左成猜野, 不過呢, 貓奴係唔會後悔既, 貓奴仲覺得買得唔夠, 呵呵, 有好多野都想買, 耐何資本有限囉, 雖然貓奴都係碌咭, 但都唔敢去到咁盡呢, 費事去完迪迪尼之後要去搵邦民囉, 呵呵..

         今次既同行係亞BEAR, 佢都好細膽架, 不過呢, 有朋友仔極力推介我玩飛越太空山, 我就捉左佢入去玩, 排隊既時候, 亞BEAR已經係發緊呆, 望住架車呆左, 不過呢, 我點都捉左佢上車玩, 初初我以為, 有細路仔, 小學生同老野排隊玩, 都應該唔係好激, 點知...係激到爆, 玩到個頭都甩左係太空山囉, 落左車都兩腳飄飄, 魂魄唔齊囉, 跟住玩完呢個咁激既遊戲之後, 亞BEAR就咩都唔同我玩, 總之係機動既都唔多同我玩, 有D唔盡慶囉, 如果佢大膽D就好了, 如果佢大膽D, 我一定再玩多一次囉, 呵呵, 因我係無心臟病既, 呵呵, 勁...不過呢, 在迪迪尼真係有奇妙既事發生, 就係我愛上左一個人, 就係....維尼熊了, 同佢影相既時候, 我地一吻定情, 之後貓奴去SHOPPING時都有去掃少少佢既產品囉, 買左個維尼熊糖果袋俾自己, 真係HIGH到爆, 真係好想再去一次哦, 如果有同事有多既QUOTA, 不如帶我去玩丫, 我真係好想再去多次哦, 有一個維尼熊既什麼冒險之旅我係未玩架, 我要再入去會我既情郎維尼熊哥哥, 耶~~~