今日係尖同事既LAST DAY, 明天佢又有一個新開始, 唔知我幾時先可以學到尖同事咁灑脫, 可以話走就走呢, 可能俾人迫到去某一個地埗, 就唔會有機會俾你留低, 不過呢, 而家都有D唔捨得呢位同事, 雖然佢唔係係總行做左好耐, 不過都算係一個好同事, 夠搞笑囉, 希望佢去到新既工作環境都可以咁開心啦!!

         琴晚發生左D好笑野, 近來都涷返少少, 又超大的風, 我真係好怕我屋企D窗門吹落街, 好在, 咁多隻窗都依然係度, 日久失修, 打風之前我都要搵D錢去搞搞佢, 不過呢, 正當我放左工, 坐係飯枱食緊我既麵包時, 發覺有D怪聲係窗口, 原來放係花槽既膠盆, 想吹落街, 當我走到埋去時, 佢已經飛走左, 捉都捉唔住, 唉, 要走既始終要走, 塵歸塵, 土歸土, 咁我有D唔捨得果個膠盆, 因為佢點都係我既EX洗面盆丫, 點都有D感情丫, 話走就走, 唉...不過呢, 花槽裡仲有D危險品, 就係元寶筒, 亞媽問我, 個元寶筒蓋無飛落街吧.., 我見到就好似無囉, 如果真係飛左落街, 就會變左血滴子, 邊個行過貓奴樓下就邊Q個死, YEAH

         "線雞"唔知大家有無聽過, 即係太監雞, 無左小弟弟既雞, 應該係咁解, 咁呢, 小柑柑係線貓, 即係佢已經係...呵呵呵囉, 所以呢, 佢應該唔係叫春囉, 我都有D擔心佢, 不過佢食得又瞓得, 應該係悶囉, 想人同佢玩, 但我近來真係都幾累, 所以都無同佢玩, 同虎虎會好玩D, 因虎虎又唔叫, 又俾任我魚肉, 所以而家呢個形勢, 係梁虎虎嬴緊一個馬鼻囉, 呵呵, 連老媽子都覺得虎虎可愛D, 不過呢, 家姐話虎虎個PAT扁左少少, 可能係我成日都當虎虎係枕頭吧, 呵呵

          我其實唔係一個好主人, 我係鐘意貓, 但係唔夠錫貓, 所以如果柑柑百年歸老, 我又自己一個人住, 都未必會再養貓了, 我怕貓跟住我, 會唔夠開心, 有時見到樓下個草地D貓好自由自在地跑, 又可以撲下花花同蝴蝶, 幾好丫, 雖然佢地有可能俾野狗咬死, 但佢地都總算自由過, 以前呢, 小白成日都望街, 可能佢都好響往果D日子, 我而家又可以俾D咩俾柑柑呢???

         柑柑呢排成日都叫, 應該唔係叫咩掛, 因為佢都變左"線貓"啦, 都唔知做咩, 我又成日都包雲吞, 一返到屋企又累到死, 都無晒力同佢玩, 佢又不停地叫, 搞到我都瞓唔到, 我地一罵佢, 佢就駁咀, 叫得仲西利, 都唔知佢想要咩, 好煩哦, 連我地主人瞓覺既時間佢都要叫, 係凌晨兩點幾佢都要叫呢, 煩死, 柑柑你係唔係迫我唔要你呢, 下...

         今日家姐佢要上大陸工幹囉, 好開心, 屋企會少左個人, 又會靜好多, 而貓奴亦都有覺好瞓了, 好期待今晚呢, 呵呵, 希望要發個好夢, 又可以瞓晏D, 想起都好開心哦, 呵呵, 最好就去耐D, 咁我就可以過幾日靜靜的日子了, 今日呢, 我放工要去宜家家私買張摺橷, 我要慢慢地添置D野, 預備我既電腦既降臨...

         明明係咳既, 而家變左包雲吞, 真係邪, 不過呢, 貓奴想包雲吞多過咳囉, 因為如果你搭巴士, 你一咳, 個個都會望住你歧視你, 但係包雲吞, 可以靜靜地包, 包保無人歧視你, 呵呵, 琴日係公司好似已經有d燒, 咁返到屋企食左d包就瞓下啦, 點知柑柑唔識做, 係咁喵喵喵, 我一醒左佢就唔叫, 而家玩野嗎, 真係激q死, 好在家姐返左來佢就唔喵, 我就瞓一陣再去洗白白囉, 今日呢, keep住包雲吞, 仲要用左$5.6買左盒好少少既雲吞皮呢, 又要買感冒熱飲, 真係破財了, 各友好同事都叫我睇醫生, 我都係等出左糧, 仲係好似而家咁先去睇了, 小病是福丫麻, 呵呵

         琴日呢, 去左尖咀食韓燒, 呢間韓燒之前已好想食, 但上次係星期五去, 所以呢, 好Q多人, 今次去到就差唔多成間都係吉店囉, 咁我地一行五人(小青, 日本文, 仙女LING, 貓奴, 加埋唔做既爆眼尖同事), 入左去叫左個2-3人食既餐, 都要600蚊, 不過呢, 唔好諗住2-3人餐, 5個人夠唔夠食, 其實大家都唔太大食, 食到咁上下大家都投降了, 呵呵, 跟住要我地四個人請爆眼尖同事食呢餐飯, 講真, 呢餐飯都幾失望, 第一, D野食唔係想像中咁好食, 第二, 唔知點解我地都有好多DEAD AIR, 無野講囉, 都無上次咁好笑咁好玩, 第三, 明明係FAREWELL, 但係就無影到相, 都唔知點解, 希望呢, 佢走之前大家可以影張相仔留念啦, 呵呵

         跟住唔做既爆眼同事佢有下場, 咁我地分頭走啦, 佢有佢既下場, 我地就又去左玩塔羅牌, 今次貓奴無再玩啦, 因我都係玩左無幾耐, 咁第一次去既日本文同小青玩啦, 等到差唔多11點先到佢地兩個囉, 不過係等既期間, 有位哥哥仔LEO哥挑逗我地既仙女LING, 所以呢, 仙女, 你唔駛減肥啦, 你齋坐係度就已經有人問你攞電話啦, 幾勁丫, 呵呵, 我地最後12點先走, 貓奴搭地鐵再轉巴士, 返到屋企已經係點幾了, 所以而家貓奴真係好累, 而且大前晚食左扭扭薯條, 個喉嚨已經著左火, 琴晚再食韓燒就再發大左D火, 而家貓奴好似食左FING頭咁, 頭重重加暈暈地, 唉........

         98839, 你係唔係要開團, 你又唔係OPS, 竟然夠膽開團, 仲要係我個SPACE度開團, 哼哼哼, 不過我都超想報名, 實行呢, 我地一月一次美食團聚會啦, 呵呵

         P.S.貓奴谷左一粒好大粒既暗瘡, 所以今次無人相俾大家睇, 呵呵, 睇下花茶, 會令大家心境平靜哦, 呵呵

         貓奴呢今日考完試了, 而家係公司等緊d團友, 不過呢, 個個都話要ot, 咁即係不停地等啦, 真係丫, 不過貓奴真係好q累, 所以借左98839個位坐下, 順便update下個space啦, 唔該晒, 吳小粉...

         爆眼既J同事做埋月底就唔做了, 本來已計劃幫佢FAREWELL, 搞左個深淵美食團, 仲要我地請佢, 明明係我地幫佢做野多D, 都要我地請佢, 有D唔抵, 哼哼, 不過有D野, 令我有D討厭佢, 唔想幫佢搞美食團, 不過呢, 佢點都係我既同事, 又間唔時帶左D歡樂俾貓奴, 而且佢又夾份買左我夢寐以求既B仔銀包俾我, 咁我都要出D力, 令佢覺得我地係佢既好同事啦, 不過呢, 貓奴有D擔心, 擔心明天會玩得唔開心, 希望呢, 我補考又PASS, 去街又玩得開心啦, 呵呵, 不過呢, 應該會玩得開心吧, 因為呢, 我琴日讚爆眼同事隻眼好迷人呢, **迷人=迷你到笑死人!!**

         貓奴會KEEP住搵工, 多謝各位既疼愛, 好開心, 係度有咁多好朋友, 呵呵, 我未試過一份工可以同大部份人都夾得來, 個個都對貓奴好好, 開心死我, 不過我真係想有更好既發展, 希望仲後生試多D野, 好開心, 有兩位好同事都升左職, 恭喜兩位美人, 希望你地做得開心D, 做到M為止, 呵呵, 貓奴要溫書了, 如果明天返來公司就話俾大家知貓奴既補考結果啦, 今晚一定要開夜車........

       

      

         今日食LUNCH時, 日本文八左俾我知, 我亞姐入完經理房之後, 就講左句"根本問題唔係我度, 問題係在佢度", 即係呢, 根本我同佢見完晒咁多位經理之後, 佢都覺得佢自己係無問題, 而問題只在於我, 好唔明, 咁點解唔直接炒左我呢, 好煩, 炒就炒, 唔好因為公司既制度而令你地卻步, 你估你地唔炒, 我就會安於現狀, 好假地去做人嗎, 而家我要好有熱情地對住一個我呢世人最憎既人, 對住佢, 我唔知咩叫做EQ, 咩叫做人性, 唔知咩叫控制, 我簡直係失控, 但我既好友奇連都覺得亞姐們講得無錯, 奇連都覺得我態度有問題, 你估我想有問題嗎, 我原本唔係咁既, 如果你地來試下, 睇下有無事丫, 有時D野, 你唔試過你係唔知係咩結果既...我而家已帶上假面具, 希望唔會失去真正既我...火爆既我..愛笑既我..瘋癲既我...

         今個星期三貓奴會去補考領隊牌, 連埋第一次, 今次係補考第二次, 即係TOTAL計考第三次, 好怕又唔合格, 一合格的話, 我走既決心又增大, 我本來定左個日字, 同B經理講唔做, 咁做多一個月, 就可脫苦海, 但錢真係唔多夠用, 而且真係好唔捨得, 另東方果面仲未叫我去IN, 所以..唔通..要做耐D????

         今日輪到亞姐入房見大經理, 我食飯前已入左去, 唔知佢講左D咩呢, 不過呢, 都唔會係好野囉, 可能又係話我態度唔好, 其實我份人唔係咁既, 不過對住佢就會露出另外一面, 琴日俾另一位B經召左我同亞頭入去, 我都唔多講野, 因我覺得呢, 佢地已認為我係態度唔好, 又唔想想我點解態度唔好, 唔通我一入來就係咁了嗎, 我都想做一份工做長D, 不過呢, 真係幾難捱, 搞到成個人都變晒囉, 又因為同其他同事FD少少, 而俾D大粒既覺得自己唔撐自己個部門, 即係覺得我手指"咬"出唔"咬"入, 我真係好慘, 我都知我都有錯哦, 不過呢, 同我FD果個同事都就快唔做了, 我應該少一個把柄係D亞姐手, 唔知可唔可以做落去呢????

        有D唔捨得D同事, 走既走, 當有人走既時候, 我都好想走, 我唔適應身邊環境既人走, 所以我寧願我走好過你走, 呵呵, 起碼係人地唔捨得我囉, 如果有人會的話.......呵呵

        我知自己成日想野都好負面, 想野唔夠積極, 而且呢D想法仲要只係用係工作上面, 我對朋友都唔負面架, 都希望大家開心, 所以俾人覺得我係癲婆都無所謂, 我幾唔開心都好, 都想身邊既人開心啦, 只要有人因為我有少少開心, 我都會做人提起勁一D, 所以我前幾日同98839講, 無左佢, 世界都無晒顏色, 我都幾在乎人地點睇我, 所以你地唔鐘意我, 都唔好表現出來, 唔該, 呵呵...

         琴日呢做做下野, 日本文叫我, 原來係佢做完了亞彼蘇, 輪到我入去了, 好驚, 完全無心理準備, 妖, 真係唔知點, 咁呢, 經理問我做野係唔係好唔開心, 因佢見我成日都面黑, 但係呢, 我個樣天生就係咁架啦, 唔講野就係咁, 咁而家點先, 係唔係要我去整容, 搵人支助我丫, 咁你就見到滿面笑容既貓奴了, 橫掂都係, 不如俾埋錢我去抽脂, 咁呢, 我瘦左, 條走廊又大條D, 幾好丫, 一家便宜兩家著, 呵呵, 咁呢, 俾經理迫供既期間, 我覺得佢都唔多信我, 又覺得好似咩都係我錯, 總係要我去改來就我亞頭, 我超唔開心, 跟住就流下深情既淚珠了, 唉......我不嬲都好眼淺, 跟住今日亞經理行埋我個位度, 叫我同亞頭得閒就搵佢, 妖, 即係要俾兩個人一齊插, 好唔開心, 又好驚, 個個同事都覺得我入到去一定喊, 咁.......我可以點呢?

         好, 講D開心野, 琴日同小學既同學小婷聚一聚, 我地係應該小學一年級就識既, 我四年級時已走左轉左校, 之後大家都係靠書信來往, 大個D就每年書展都見一見面, 不過呢, 近年佢上左大陸讀新聞, 係我最想讀既科目, 佢將來應該會做記者, 又係貓奴最想做既工作, 真係好唔抵得佢, 呵呵, 咁食飯都好好玩, 不過呢, 多數都好似只有我講野咁, 真係唔好意思呢, 呵呵, 跟住講起唱K, 我話都有好耐無唱了, 所以興之所致, 我地就去左唱K了, 呵呵, 我地唱到一點鐘先散, 我行到去地鐵站剛好係最尾果班車, 好險, 因貓奴唔識由尖咀搭車返屋企囉, 呵呵, 路痴...

        琴日最開心應該都係呢一聚, 因我收到小婷送既生日禮物呢, 估唔到過左都有得收, 呵呵, 而我因無買禮物而變成無心肝既貓奴, 呵呵, 不過呢, 好開心, 佢送左一隻貓公仔俾我, 我返到屋企就幫佢改名, 而家想緊, 叫"梁牙牙"好丫, 定係"梁燦燦"好, 呵呵, 大家睇下佢叫咩名好丫...

        P.S.只有一位仙女亞姐唔明貓奴既文章, 佢果然係QUEEN OF THE GAP

        我都估到琴日編space一定無咩人睇得明, 不過貓奴既表達能力, 自問都唔錯哦, 不過點解會有人睇唔明, 咁睇唔明果個一定係唔夠聰明啦, 呵呵, 不過呢, 貓奴都會再解釋下囉, 呵呵

        奇連=中長同事

        FD=我個IVE同學

        FD個亞哥=奇連同學

        我=貓奴

        咁上星期五見到FD, 我幫佢入左減價紙, 因佢報左我既台灣團

       琴日奇連問我可唔可以入FORM減價, 因個團明天走, 而我個FD都

       係報左呢團

        跟住我問奇連佢個朋友姓咩, 因我都有朋友報左呢團,

        點知呢, 奇連想減價既客人就係我個FD既亞哥

        就係咁邪

        如果仲有問題, 可以打內線98206查詢, THANKS

         好邪, 上星期五在公司撞到個舊同學, 已有好多年無見, 都差不多兩年, 咁原來佢報左我地公司既台灣團, 好q邪, 我又係做台灣線, 咁我想起想俾d野台灣果邊既妹妹, 搵下呢位朋友仔幫手攞落去啦, 點知佢懷疑我俾白粉佢, 妖, 我似d咁既人咩, 車, 不過呢, 我係好好人屎既, 我照返去公司度幫佢入申請減價既form, 減左每位50大元, 都好過無丫, 不過呢, 邪在頭先有位美人同事奇連問我一樣野...

        奇連佢問明天走既台灣團仲可唔可以入form減價, 咁我緊係話可以啦, 呵呵, 咁我問佢個FD姓咩, 因為我又有FD幫左呢團, 奇連同事又大我, 佢話佢個FD唔係我個FD, 點知, 係同一班人, 佢個FD係我個FD個亞哥, 都係同一個PARTY囉, 呵呵, 好邪, 奇連係佢哥哥既同學, 而我呢個FD又係我讀IVE時既同學仔, 真係好邪, 佢亞哥因為減價而打俾奇連, 呵呵, 跟住呢, 我運用我台灣部既勢力, 搞定個減價, 不過呢, 問題出現了, 我無晒貨仔俾個FD帶落台灣, 點算好呢???

         今日又係一年一度既炳權日, 好多男友都要做炳權, 俾d花店"湯"到一頸血囉, 琴日放工時一下車就見到有個人送花既, 好大札呢, 我數過, 有59支咁多, 係紅玟瑰, 真係好鬼靚囉, 呵呵, 唔知貓奴幾時有機會收花呢, 呵呵, 講下o者...

        係度祝大家情人節快樂, 我影左人地d花相, post俾大家睇下啦, 呵呵,

        P.S, 貓奴既手工不嬲都唔錯哦, 不過呢, 整呢D相都係第一次, 成績都唔錯, 不過呢, 要係貓奴既好好好朋友先可以擁有哦, 而且要有咁正既廣告先整到, 不過呢, 如果大家有興趣想要, 我都好樂意去做一要俾大家哦, 呵呵

         星期六睇左隻VCD [老友狗狗], 超好睇哦, 睇到有D眼濕濕, 不過又唔可以在家人面前喊, 呵呵, 不過係極力推介既新片, 愛狗既你, 更加唔可以錯過, 不過呢, 貓奴買左正版既VCD, 有興趣可以借俾你地睇哦, 呵呵, 波子真係超可愛, 如果柑柑好似佢咁乖就好了, 我行街街之餘都買左小點心俾柑柑食哦, 呵呵, 佢不知幾鐘意食, 我同家姐想緊, 買唔買座玩具俾柑柑玩好, 又有磨抓, 又有波波, 不過家中空間有限, 想下先啦, 咁柑柑你等下先啦......喵.....

         星期六呢, 留左係公司OT整野, 整埋一個好URGENT既禮物俾美麗既壽星女98839, 一邊整一邊笑, 阻住左進度, 不過制成品好掂, 不枉我用左咁多時間呢, 開心死, 我為我既傑作影左D相, 簡真係極品, 仲有D柑柑既新相, 都好可愛哦, 柑柑琴日玩到差D夾住左個頭, 呵呵

         各位, 等月尾, 梁伯友叉足電之後, 貓奴就會叫佢整D新口味俾大家試下, 呵呵

         琴日同左台灣來既欣怡姐姐去食飯, 好不幸既, 係佢住旺角既朗豪酒店, 貓奴最唔熟既旺角區, 唔熟到可能蕩失路, 咁呢, 只剩下我同佢, 我又唔熟路, 佢叫我不如返屋企先, 不過我都知佢係講笑既, 呵呵, 好開心, 不過有時我都聽唔明佢D普通話哦, 因我的普通話很爛哦, 爛到死, 爛到...(想唔到形容詞呢), 咁我帶左佢去食米線, 味道OK啦, 不過仲要佢俾錢, 我真係好唔好意思囉, 我呢個東道主真係唔掂, 我真係愧為香港人, 我本來想帶佢去銅鑼灣架, 不過呢, 佢話累, 咁我唯有係旺角行, 行來行去都係果兩條街, 因真係怕行唔番去酒店哦, 呵呵

         跟住呢, 今日終於收到個LAND俾既利是, 好差大封哦, 有一猜野, 好開心, 有咁多錢, 可以去考慮買個電話呢, SONY ERICSSON 定係NOKIA好呢, 好心急哦, 今日放左工呢要去搵台灣姐姐, 買左D野俾佢, 所以要去一去旺角放係LOBBY先, 跟住再去搵家姐行街街, 好開心, 因有錢, 又有人陪, 好耐都未同過家姐行街了, 起碼都有幾個月了, 希望今日會買到好多野啦, 用盡一猜野, 呵呵

        多謝各位, 我會轉達你地對梁伯母既支持, 我會好好地鞭策佢, 叫佢整多D好野俾大家食架啦, 我記得媽媽整泰式涷雞翼幾好食架, 不過呢, 貓奴對仙女之梁伯友既白切雞都好有興趣哦, 小K講得啱, 可以斬件帶回來哦, 呵呵, 98839, 你喜歡個蛋糕就好了, 不過你今朝件蛋糕都好似唔錯哦, 我既人情呢, 一定要有魚翅食先會出手哦, 所以呢, 你記住請我飲, 而家我就儲定錢先, 呵呵

         今年新年前已fax左一張賀年既fax俾台灣果邊, 仲要寫埋叫果邊個老細今年封利是要大封d囉, 不過呢, 到今日為止都未收到囉, 我搵間碟查到, 台灣個老細己派左了, 只係未到我手, 可能係搵人拎返來, 不過呢, 多數都係send左俾我個賤亞頭, 其他人都認為係我個死人亞頭吞左唔俾我, 我覺得超唔開心, 明明係我既野, 條八婆唔俾我, 佢如果真係吞左, 我真係耐佢唔何囉, 唉, 我好想問佢架, 不過呢, 點問丫, 佢如果話人地無send來, 我就無野好講, 但我私底下問左係有架, 我都唔想成日幻想佢係衰人, 不過連其他人都係咁諗, 唔通我封大利是真係俾佢吞左, 好好好傷心...

        今日係98839 pinky姐既生日, 祝你生日快樂, 一日比一日開心, 聽聞你想減肥, 咁就祝你早日減肥成功啦, 呵呵, 仲有快d同honey拉埋天窗啦, 我好耐都無去過飲啦, 你快d請我去飲啦, 呵呵, 總之, 希望你有一個超開心既生日, 禮物明天候補俾你哦...

         小ling, 唔緊要啦, 反正要齊人先好玩, 下次我地5個人一齊出去玩, 加倍開心啦, 仲有呢, 媽媽好似識整芋頭糕既, 不過呢, 俾梁伯母休息下先, 希望下次整過第二d野俾大家食丫, 多謝各位對梁伯母咁支持, 佢知大家咁鐘意食, 開心到"look"地, 呵呵

         其中一位團友日本文佢有要事做, 我地個團FC左了, 嗚.......跟住小青佢一見日本文唔去, 就即刻約第二個, 我截都截唔住, 本來想3個人都好丫, 唉, 而家只有我同小LING, 都係FC既多了, 咁唯有睇下台灣來既妹妹今晚搵唔搵我啦, 真係頭都痕埋了, 唉, 點算好呢, 真係好煩, 本來想癲番晚, 最後可能都要係屋企呆一晚囉, 呵呵, 如果寂寞的你有空的話, 可以搵貓奴同你行街街哦, 等你哦, 寂寞的心的朋友, 呵呵

         開團了, 今次真係食韓燒, 真係想起都想食, 不過呢, 撞左期, 咁啱台灣既美女欣怡來港, 不過呢, 我都係覺得同事們重要d, 唔係話台灣來的不重要, 而係, 可以約第二日, 我又未想到帶佢地去邊, 香港有咩特色野食呢, 想到頭都爆囉, 我去開既都無特色囉, 有無人可以俾d idea我, 呵呵

        p.s 小青, 我都係講笑的哦, 如果你唔講野, 我既人生就會無晒色彩哦, 98839, 你有無再去逗利是, 琴日都初十啦, 我己無晒逗利是既衝動了, 小ling, 我地lunch已拆穿左踩場者, 所以應該以後都無人去踩場架啦, 呵呵.....

         剛剛同D友好同事食完飯, 小青同事佢話佢已睇左我果期COSMO GIRL, 咁呢, 佢話書中另外有一個都係叫QUEENIE有感情問題, 出左來做野幾年都無拖拍, 佢懷疑果個係我囉, 雖然我都有同樣問題, 但我對呢D野都不嬲唔恨囉, 順其自然係最好既, 千祈唔好似隔離部門既朱同事做一個老是等愛的老女人, 我唔駛等, 有就有, 無就無, 可能個天覺得我唔配有掛, 所以就賜左柑柑俾我解寂寥囉, 呵呵

        D同事睇完之後都有不同既反應, 不過大家都發覺文中有好多"呵呵", 我都係不自覺地打左上去既, 如果我知佢會登, 一定寫好D, 唔駛而家俾各友好同事取笑啦, 有D白痴妹仲要玩匿名踩我場, 一估就估到係邊個啦, 正傻仔, 呵呵, 我真係想再寫D野多謝個編輯登我既信, 估唔到佢無掉到我既信, 不過呢, 我覺得如果我真係有問題, 我都唔會寫信去問, 揚晒出去, 都唔係咁好, 因D編輯講野都好玄, 有時佢答左你都係一滴汗, "向左走還是向右走"好呢...

        P.S. 小青同事下次你屈我的時候麻煩細聲一點, 因我仲想留係度做住先, 俾返小小形象俾我吧...

         星期六放左工之後去買cosmo girl, 我等左好耐啦, 明明個個月都係一號就出架啦, 去左7仔幾次都唔見有, 終於星期六就有啦, 返到屋企邊食野邊睇啦, 睇到有一版係登讀者來信果版, 見到有d野好熟面口既, 原來我之前寫俾佢地既信登左, 好開心, 當初係因為佢地既編輯講msn, 所以就e左封信俾佢, 佢都有覆架, 估唔到隔左咁耐, 佢就登左係本書度, 唔知佢係唔係因為有位淨至登呢, 不過點都好, 佢有覆我已好開心, 佢覆我既時候已覺得佢好nice, 我之前試過寫野俾F & B, 佢地D回覆超串既, 所以以後都唔買果本, 轉左睇comso girl, 呵呵, 唔知係唔係感應到佢會登我既email, 所以不斷地期待佢出版, 總之好開心啦......