| Queenie's profile涼QQ & 小柑柑的世界~~PhotosBlogLists |  Tools  Help |
|
December 31 我的表弟~~星期六收左工去左柴灣,
因為係婆婆既生忌,
亞姨佢地話要幫婆婆搞生日會,
所以我就去左中環JOIN媽媽再入去,
去到跟住就好無聊,
因為好多人都未到,
不過有個舅父既仔仔同佢個賓妹就到左,
即係我表弟,
因為呢個表弟係好少見既,
又係舅父同第二任老婆生既,
所以就更加生疏,
不過果日表弟就不停痴住我,
我不嬲對小朋友都麻麻地既,
可以避開就避開既,
不過同佢玩又唔討厭, 所以就同下佢玩囉,
表弟好奇怪架, 有椅係唔會坐架,
一見大脾就坐上去,
一行埋我度, 行埋任何人度都係住大脾,
我覺得佢係一個專業坐人地大脾既小朋友,
佢仲識得玩自拍架,
係咁攞住亞媽個手機玩自拍,
仲問我點解我咁白, 多謝你, 表弟, 唔知你係讚我白丫, 定係覺得我白到似鬼,
同佢講起海洋公園, 佢又話我眼好黑, 可以做熊貓,
表弟, 你真係好搞笑,
不過開心既時候係唔多既,
食蛋糕既時候,
佢無啦啦同佢同父異母既亞哥打交,
正確來講係表弟打佢亞哥先,
跟住舅父就嚟料,
係咁鬧個大, 話佢唔就個細,
根本係表弟打人在先,
咁大既就唔抵得頸, 就覺得老豆係偏幫個細既,
唉, 就咁就口角了,
跟住亞姨出來搞定佢地啦,
不過都個個唔開心了,
細既表弟喊到眼淚鼻涕成面都係,
唉,
細既唔聽教, 做老豆既就係識喊打喊殺,
你睇完你都會想,
第時要唔要結婚生仔.........
因為細既難教, 大既唔收, 就真係日日都家嘈屋閉....
新既一年, 希望大家都身體健康, 開開心心, 心想事成, 出團既朋友就搵多D..................
HAPPY NEW YEAR 2008!!!!!
December 28 好味道丫~~近來都鐘意飲D有味道既野,
平時都係狂飲水既,
唔知點解本身係特別渴,
成日都想飲水既,
不過近來就常常飲有味既野,
我都知有味既野, 就一定比水更肥架了,
不過我都係好想飲呢,
好似咖啡咁,
前一排去左一間叫HABITU既CAFE飲野,
我叫左杯士多啤梨既咖啡飲,
入落去唔太濃咖啡味,
而且賣相十分之討好呢,
而且包包野食都好好味,
不過消費就比較高囉,
不過我估同星巴克差唔多,
但係坐就一定好坐過星巴克囉,
因為真係好靜哦,
所以呢,
小LING, 下次飲野唔一定要去香港公園架,
去灣仔 OR 美國銀行中心果間HABITU都OK架,
冬天到了, 我都唔想你喺公園冷病哦,
呵呵
December 27 生日禮物後記~~今年好開心,
雖然只係收到一份生日禮物,
不過都係我鐘意既B仔既野,
就係頸巾了,
好開心,
不過怕就怕在而家香港既冬天都唔涷了,
都唔知會唔會有機會用,
我記起上年生日時都要用頸巾了,
今年我連厚小小既褸都未著過,
天氣真係好反常...
跟住都有收到媽媽既利是啦,
今年好似都無人記起我既生日咁,
不過都算啦,
人地記唔起, 都唔可以用來做一個FD唔FD既準則既,
只要我認為重要既人記得就可以了...
跟住呢, 前日就由台灣返來了,
出團都有好多驚險既野啦,
唉,
希望唔好有咩是是非非啦,
因為我覺得一D唔熟既領隊係好口疏,
仲要俾佢地知道D咁既野,
最慘係當時人都知,
場面係好尷尬囉,
唉,
唔好傳到返亞姐耳邊就好啦.....
所以, 請大家保守秘密,
唔好咁易就將我地既野講出去,
THANKS.....
December 17 生日快樂 to me~~咁快就到左我既生日了,
今年好似有D不快既感覺,
因為老母都無同我講生日快樂,
今年佢好似淨係想幫家姐做生日咁,
當我透明,
琴日叫外賣,
叫左我唔太愛食既肯德基,
所以我一件都無食,
自己煲左D隔左唔知幾多夜既湯來飲,
仲好似煲燶左,
因為"痴"左底,
咁佢地外賣到左都無叫過我食, 自己仲食得好開心,
OK, FINE, 唔食都無所謂丫,
跟住食蛋糕,
都係我沖緊涼既時候食,
OK, OK, 最多我自己聽日買俾自己食,
唔食你果D我又唔會死,
估唔到自己亞媽都咁對自己O者,
你生日又成日叫我買禮物俾你,
咁我生日你又點對我,
下年, 你唔好要我同你做生日,
哼, 講起都好火,
當初係咁, 就唔好生我出來丫,
好興........
不過返到公司都好D,
因為好多同事同我講生日快樂,
好開心,
多謝各同事,
我仲將佢地排左次序...
雯雯第一.跟住亞琪, candy仔, 大脾, 小青, wing, 吳小pink, 霞姐,
親愛的, 小ling, Vian, Mui, 背後的BABY, 小K(亞雲), 萍萍,
希望會再增加落去啦....呵呵 December 14 公司BBQ後記~~近來記性真係麻麻地啦,
今日先醒起未打BBQ既野,
公司用左我地既遲到錢搞BBQ,
仲係可以包晒成公司去,
公司都有成千人呢,
當一個人80蚊, 都有8萬蚊遲到錢,
仲要未計有獎抽喎
我覺得自己都貢獻幾大架,
記起小青知搞BBQ時就過來多謝我,
因為我每個月都有幾廿蚊遲到錢,
有時我都唔想遲架,
不過我又唔想咁早起身,
唉
BBQ前我返左公司JOIN埋各位好同事出去,
仲有可以見到日本部既得力助手亞君,
雖然只係幫手一個星期,
不過雯雯已覺得佢係好幫手,
果日係佢在HQ既LAST,
所以就同佢影左張相...
跟住BBQ其實有D悶,
如果CANDY陪住我玩就好開心囉,
佢一行開左就悶到死.......
最後我就唔夠10點走左了... December 13 有D緊張~~近來好似又好易肚痛,
每每想到出團既野,
個肚就咕咕聲...
我唔想出團又肚痛呢...
我記起次次我都去到中正紀念堂就痾, 呵呵
佢地個廁所好乾淨架, 呵呵
呢D係唔係出團前候群症?
有時真係痾到好心灰架,
痾到咁都唔瘦一磅,
可能自己太好胃口掛,
見到雯雯咁瘦,
我就會幻想,
如果我都可以咁瘦就好啦,
不過我會唔會有咁既機會??
希望來年有新開始,
可以有我既春天,
身體健康,
財源廣進..... December 12 醫生話無暗病~~頭先四點度出左去睇中環既醫生了,
因為今日CAN'X左LUNCH BUFFET,
所以我就決定去睇醫生啦,
間診所去到都無人既,
只係得醫生一個人,
護士應該係HIGH緊TEA吧, 呵呵
醫生好NICE,
真係一個好醫生哦,
你每次睇完佢之後,
佢第二日都會打去問下你既病情架,
感覺係...仁心仁術...
咁醫生同我睇完就話,
應該唔係血管有問題, 關於果D小紅點..
醫生覺得係皮膚有問題, 轉介我去睇皮膚專科...
不過佢都建議我去驗下血小板,
好驚呢, 希望唔好有事,
不過醫生都話唔係有暗病,
要睇左皮膚科先知,
呢個郭醫生介紹皮膚專科時話個醫生成日都上電視,
不過價錢好商宜....
我怕會好貴囉,
希望會平d囉,
不過我知保險未必有我cliam....
咁我就大出血了....
仲有....
返到公司睇下個皮膚科既咭片,
竟然個醫生係皮膚....
同.....
性病專科........
唔係下麻.........
幫郭醫生賣下廣告:
郭松漢醫生,
中環余道生行7樓702室
TEL:2537 5188 December 11 小紅點~~不嬲手臂都有D小紅點既野,
不過都係近幾年比較多一D,
有D似係血痣..
有D似係血管爆左咁,
都唔知係咩來既,
我見佢又唔痕又唔痛,
所以都無理佢,
不過前兩日喺屋企開大既時候,
有D悶,
就望下佢地啦,
點知見到手背上面都開始有幾小小點既血點....
唔係下麻,
生到上手背,
真係好怕生到成手都係,
搞咩架...
上次有個領隊A話佢家姐都係咁
我又無留心聽人地講野,
好似記得佢家姐都有去睇醫生,
咁我都好有衝動去睇醫生呢,
中環果個醫生又收六點,
我估我先去屋企附近既醫生睇左先,
因為我好想知係咩來哦,
仲有前一排成日都耳仔深深深處痛痛,
可以順便睇埋,
真係想講一句
越窮越見鬼!!! December 07 本周星座..係唔係真架??
台灣之旅第十一次~~包埋我之前出左兩次FAM TRIP,
我今次聖誕又再去台灣就係我人生第十一次,
年幾內去十一次係唔係太過份呢,
不過雖然係去左咁多次,
不過有好多地方我都唔係太熟,
仲有呢, 我既尾咪都依然唔係講得好好,
有無人可以教我講好D呢?
講起搵人教, 有D同事好怪...
因為好多同事都會冷熟架,
講多幾次就扮晒好似識左好耐咁,
其實我都唔介意識多幾個同事既,
不過...
感覺好似怪怪咁囉,
又未見過,
就算有D成日都見既同事
我真係唔知佢叫咩名呀....
真係好怪....
丫, 今次去台灣,
真係好想拍小曹哦,
不過上次問佢, 可唔可以下次落去再拍佢,
佢話唔一定拍佢既, 可以拍下豪仔果D,
咁即係, 係唔係覺得我好麻煩呢?
都係同中符講下先,
我想要個好D既T/G哦...
仲有今次小青同小MUI都一齊去.
仲要係同一日,
真係好開心
我地要一齊去食宵夜呀............ December 05 狗哩熊~~發覺原來都有好多人鐘意狗哩熊架,
不過狗哩熊唔係真係叫狗哩熊,
好似係叫RELEX熊, 有D舖頭改左佢個中文名叫鬆弛熊...
個樣係好嘆既樣,
如果我既人生好似佢咁就好了,
食下, 瞓下, 又唔駛返工,
丫,
其實我發現左中長個新同事同大頭都鐘意呢隻熊,
大頭仲要同人咁大既狗哩熊影左相添哦,
好可愛,
如果我都可以去日本同佢影相就好了,
見到佢, 人都好開心,
唔知幾時開始鐘意呢隻野...
通常我鐘意既公仔,
都只係會流行一排就無左,
HIT一陣就俾人打入冷宮,
不過呢隻熊都紅左咁耐,
証明佢係真係好可愛啦,
所以, 中長T同事, 唔好再話佢對耳仔係滑鼠個制...
想起上年屈左亞媽買左隻公仔俾我,
今年不如屈佢買...
呵呵呵.... December 04 24~~絕對唔係講緊果套西片連續劇,
而係講緊自已就快24歲了,
人生真係過得好快呢,
有朋友已結晒婚, 就快生第二個B了,
自己就仲未發市,
脂肪指數仲不停地隨年歲增加,
唉,
見到而家既新冬裝,
好多都好靚,
不過有九成九都唔啱著,
因為今年做左三年幾HT,
終於肥左40磅了, 恭喜晒,
如果我儲錢可以好似儲肥糕咁快就好了,
肥, 真係好慘...
會俾人笑架,
我仲之前用4千幾蚊JOIN左2年GYM,
真係20次都唔知有無去到
出年四月就到期了,
唔知幾時我又有心情去做呢??
24...
12既兩倍,
生肖都走左兩轉....
好老既感覺... December 03 第一次食你~~第一次食大閘蟹,
係因為同事們都好想食,
我平時都係因為懶拆, 所以都唔會食既,
聽到小PINK講有幾好食有幾好食,
都唔會動心, 因為真係好懶,
果日同小車車, 小朱朱, 雯雯, 小CANDY, 小BILL BILL, 同一號仔,
真係好開心,
好耐都無玩得咁開心了,
大閘蟹比我想像中易食,
我都係第一次自己拆晒成隻蟹咋,
原來裡面係咁核突既,
不過係好多膏囉, 都幾好味, 如果多D肉就好了...
食完飯就去左留下個公園係咁影相...
好多傻人...
好在個公園無咩人咋...
跟住又去左食糖水,
真係飽到上心口...
最後CANDY仔同亞BILL就同我一齊行去波鞋街搭車,
果晚大家又提起大哥哥,
本來我都開始忘記了,
因為近來都無見過呢位偶像了,
唔知點解又會提起,
BILL話有人咁樣鐘意自己都真係好好,
我都覺呢, 俾人鐘意個感覺一定係好好既...
希望下次可以再有D咁既飯局, 真係好開心,
今次令我想起上次跟青青, LINGLING, 雯雯食日航果次....
不如我地今年再食過丫, 好唔好??
P.S 飯局時, 好多朋友仔都話有睇我個SPACE架, 好開心,
原來我打野都有人睇架.....
|
|||||||||||||||
|
|
