21號去左5日台灣, 仲要係玩環島,

好多地方都未去過,

都有d心驚驚架,

好在都有驚無險,

而且好在早出發, 避過左地震,

雖然地震對d團都無影響,

不過意外既野, 真係話唔埋架麻,

而今次拍呢位T/G,

係之前同佢有D野既, 有D野既意思係...大家都唔多鐘意大家囉

我心想, 要對住佢五日都幾慘,

不過可能係台灣果邊既老板交帶過佢吧,

因老板佢好長氣, 應該唔止交帶過一次吧, 呵呵

所以呢位T/G都無點為難我,

不過我就同佢唔多夾囉,

完全都無咩溝通,

夾佢真係有D唔開心,

比起之前夾既T/G, 呢個真係地下一條草,

唔話佢係地底泥已好俾面了,

入咩站都唔同我講,

上到九份原來唔買麻糬,

仲等我之前叫D客上九份買,

根本俾D客覺得T/L同T/G都無溝通,

根本都無夾過口供,

咁點解佢叫D客唔好在九份買呢, 原來係內有玄機,

真係覺得而家D人可以貪錢貪成咁,

如果俾我出國玩, 我都未必會跟團了, 唉...

都算了,

好在都叫無發生大單野, 除左同個賤訂客鬥大聲之外, 呵呵...

今次有收獲就係去左未去過既高雄同台中,

差唔多成個台灣都去左一半了,

日月潭真係幾靚架,

BUT正當我欣賞緊既時候, 有位賤訂客死出來,

話大陸既什麼西湖仲靚,

唉, 咁你又報台灣團, 大嬸, 你係唔係報錯左團呢,

好大堆問號塞住我個腦,

OVERALL來講, 呢團都係麻麻地,

客又麻麻地, T/G又麻麻地,

好在酒店OK囉,

因失樂園今次俾D高層既房我, 唔駛住K房, 都唔錯, 起碼我會夠膽留係間房先, 呵呵

我仲影左D靚相, 技術唔錯架, 唔信你睇下丫!!!!

唉,

琴日終於派左名了,

不過就有少少唔開心囉,

因要走得好急,

21號就要走了,

有好有唔好既,

好就係, 唔駛埋尾, 就可以走,

唔好就係, 我完全都未有心理準備,

仲要係環島團,

我都未去過,

見到好多客都係做落地簽證,

真係見到都覺得有D頭痕,

跟住再收到個唔好既消息,

因太細團,

所以唔知派左個咩野GUIDE俾我,

唉,

人地亞姐都會幫下自己個助手,

只有我呢個係唔會出手,

可能係因為我唔幫佢攞野掛,

唉,

真係好想順順利利

我都唔望搵到食了,

因搵到食果個GUIDE, 直覺上我覺得佢唔多想接我既團,

所以我都費事同個LAND RQ了,

唉

點解新既一年都係咁,

點解,???

真係令我又想講果句野,

唔通連個天都唔鐘意我??

我覺得香港地真係越來越多怪人...

由其搭巴士會遇到好多,

有幾次我都見到一個女人,

好奇怪, 上左車, 搵到位之後唔會坐低,

無論架車點掟彎都好,

佢都企係度,

直至佢發覺有好多人都望住佢既時候,

佢就會坐低...(註:上面講既都發生在上層既...)

跟住今日又遇到另一個怪女人,

已經唔係第一次受佢折磨,

佢會上左車之後係咁食早餐,

車程大約係45分鐘,

到落車果刻佢都未食完,

食都唔係一個問題,

而係佢發出我最怕既膠袋聲,

"se se 沙沙"聲,

我就係最憎果d聲,

就算我聽緊歌, 加埋睡意濃濃,

我都會俾佢嘈醒,

至於佢食咩早餐, 查實只係一個包,

佢係咁"meet"個包, 我諗佢以為分開一千份來食, 就可以瘦d,

我真係想問候佢全家,

煩很到死,

你厲bear佢都無用, 呢d咁自私既人係唔會理你...

好奇怪既人,

我個袋都有個早餐, 不過我都忍住返到公司先食,

咁點解呢d人唔可以返到公司先食呢,

如果巴士公司捉得嚴d就好了, 我估罰過一次呢d八婆就會好d了, 唉...

跟住我返到公司洗杯時又俾一條八婆打尖,

真係一早就火噴噴呢,

心情真係麻麻地, 唉~~~

唉, 今日已經係14號了,

所有朋友仔都無打俾我,

我到而家先發覺, 原來自己人緣係咁差...嗚~~

咁又係既, 我既人際網絡真係好窄,

識人又少,

知心朋友就更更少,

不過,

今日出現左一線"處"光,

就係朋友仔VIAN打來約我食飯, 呵呵,

好開心,

因我都未試過同佢一齊過生日...

同佢講講下電話, 我地先發覺,

我地已識左十年了,

以前生日, 學校就一定係考緊試,

有鬼幫你搞咩,

出左來做野咁耐,

都係近呢年先聯絡密一D,

有時會出去行下街食下飯,

由其而家又有亞SUE加入, 呵呵,

希望星期六可以約多D舊同學丫,

我都係想同佢地聚下,

唔係為任何既目的既, 呵呵,

希望過一個開心既星期六,

琴日同左媽媽講

我今年要隻狗哩熊做禮物,

佢扮野唔知係邊度買,

唔緊要哦, 媽媽, 等煥煥帶你去買丫下~~~呵呵呵

星期一, 閃爍LING同我講已開始派團了,

搞到我心急如焚,

不過而家都星期三了,

咩都未派,

咩火都熄晒了, 呵呵

而且我又睇中左果團Grand Hyatt又派左俾其他人,

我既人生都無晒希望了, 嗚~~

唔通今次又再來失樂園,

果d都唔係人住既地方...

比我屋企仲要唔掂呢,

不過我都試過好多次,

你越唔想, 越拒絕既野,

佢就越係要俾你,

慌死你太開心,

而家真係有d擔心,

查實呢, 雖然我今年已出左四團, 三團台灣, 一團泰國,

但係呢, 我覺得自己揸咪講野都係好好好差,

成日都口震震咁

又唔知講咩咁喎, 我估果d guide, 都覺得我好無用, 唉,

不過為左錢, 我會加油既,

希望派團搵到錢既團俾我啦, 必勝~~~

話說琴日朝著唔到上年件長袖恤衫之後,

就下次決心琴日放工會去做運動,

到放工想走果日刻,

個心有d野既, 總係有d唔妥,

咁我CHECK下擺左喺公司好耐既果袋運動衫,

點知發覺無左條運動褲,

果陣先想起, 之前攞左去出團著,

激死我囉,

明明人地係好想好想去消脂,

點知...連個天都唔鐘意我...

真係好黑仔呢, 唉...

查實真係唔多想返屋企,

因我唔想對住家姐,

見到佢就憎了, 唉...

我已經幾日無同佢講過野了,

雖然係咁, 我前日行街時都買左生日禮物俾佢,

係B仔既化妝袋,

係之前佢自己話想要既, 我就同佢講, 會OVER BUDGET既,

因我地每年都係買$200內既,

多數我都唔理既,

佢鐘意咪買囉, 一年先一次, 邊計得咁多,

不過上年佢就買左一樣一百九十幾蚊既野俾我,

真係駛唔駛計得咁盡呢,

搵又搵得多過我,

唉....

有D無奈,

我真係好想一個人一間房呢...

今日一起身, 就打算著一件長袖既恤衫,

已經熨好晒架了,

點知...

係穿到同扣到鈕既,

點知, 一屈埋隻手就覺得無血到,

因隻手位好窄,

我又唔可以全日都唔屈埋隻手,

咁死死地氣就換左件中袖既,

不過中袖都出事,

手袖位有位鈕,

要唔扣先至會好d, 無咁窄,

唉,

真係要好好計劃下了,

如果唔係呢,

過左呢個冬天, 可能又有好多夏天衫都唔啱著了,

 

p.s. 之前買左條蛇蛇玩具俾柑柑玩,

      佢玩到癲左呢,

      但係家姐買俾佢既玩具佢就掂都唔掂,

      果然係我了解貓既品味多d, 呵呵

近來真係好懶呢,

之前堅持要每日都UPDATE既BLOG,

都可以久違左咁多日都無寫,

個人又好想好想瞓,

好似瞓極都唔夠咁,

琴日又俾我發現左家姐既惡行,

真係想唔到一個廿幾歲既成年人,

都可以咁懶咁污糟, 我真係唔想再同佢同房了, 好難頂,

我頂左廿幾年都夠皮啦, 唉,

我覺得自己成日都充滿晒負面既野,

見到好多野都睇唔順眼,

真係覺得自己好奇怪,

查實可能我自己一個人住會好好多,

又唔駛忍人地點污"WEAR",

點都唔關我事, 只係顧自己就可以, 幾好呢,

不過我又想同媽媽一齊, 因媽媽煮既飯真係好好食呢,

而且有佢陪下我玩都幾好, 雖然佢係成日都偏心家姐...

講起家姐, 今年真係唔想買生日禮物俾佢呢條自私鬼,

如果公司可以俾我早D出團就好了,

起碼我唔駛對住佢...死"拿"渣狗,

我咁講可能大家覺得我好過份,

但係如果你要忍一個人忍成廿幾年, 你就會覺得我講呢D都係濕碎料...

如果我月入過萬,

我估我一早自己搬左出去住了,

雖然會無人照顧你既飲食,

不過, 一個人, 靜, 果種感覺真係好好,

有時出團, 遇著一個人瞓,

雖然係有D驚,

但係都會得到好好既休息,

因少左同房既鼻鼾聲, 耳根清靜, 呵呵...

 

P.S. 媽媽整既炒飯好靚, 所以幫佢(碟飯)影左張相, 呵呵